U3F1ZWV6ZTIzMTg0MjgxNjExX0FjdGl2YXRpb24yNjI2NDU5MjQ3MzY=
recent
أخبار ساخنة

المنحة الهنغارية : أسئلة وأجوبة وتفاصيل شاملة للتقدم للمنحة

المنحة الهنغارية : أسئلة وأجوبة شاملة للتقدم للمنحة

في هذا المقال سنشرح لكم بشكل كامل ومفصل عن المنحة الهنغارية وكل مايتعلق بالسكن والدراسة في هنغارية بالإضافة لأهم الأسئلة الشائعة للطلاب حول المنحة الهنغارية مع الاجوبة المستقاة من خبرة طويلة وناجحة لكثير من الأشخاص.
المنحة الهنغارية : أسئلة وأجوبة وتفاصيل شاملة للتقدم للمنحة
المنحة الهنغارية : أسئلة وأجوبة وتفاصيل شاملة للتقدم للمنحة

تفاصيل المنحة الهنغارية

بالبداية المنحة بتفتح بين شهر 11 وشهر 12 وبتسكر بأواخر شهر 1 من كل عام مشان هيك لازم نجهز حالنا منيح.
المنحة الهنغارية كل سنة بتقدم عدد محدود من الكراسي لكل دولة..والسنة الماضية كانت حصة سوريا عبارة عن 250 كرسي متنوعين بين البكالوريوس والماستر والدكتوراه من أصل ما يقارب ال 5000 كرسي..

التركيز بشكل عام عم يجي لطلاب الماستر والدكتوراه اكتر من طلاب البكالوريوس ( مثلاً السنة الماضية ما بتذكر قبلوا اكتر من 30 طالب بكالوريوس من اصل 250 مقبول من سوريا ).

الاختصاصات يلي ركزوا عليها السنة الماضية بالبكالوريوس هنن اختصاصات الحاسب بشكل عام ( هندسة المعلوماتية - والفروع يلي قريبة منها )
بس هالحكي بيختلف من سنة لتانية وما حدا بيعرف شو ممكن يصير فمشان هيك رح نتوكل على الله ونقدم وانشالله الحظ بكون معنا هالسنة..

المراحل الدراسية بالمنحة الهنغارية :

بكالوريوس - ماستر - دكتوراه
وتقريبا كلشي اختصاصات موجودة بالمنحة ( اختصاصات طبية - هندسات -.....)

- في شغلة مهمة بالمنحة الهنغارية وهية انو منقدر نقدم بشكل شرطي حتى نكمل كل وراقنا لشهر 8 تقريبا ( التاريخ ممكن يتغير كل سنة ) بس في وراق ضروري تكون موجودة بالطلب يلي رح نقدمو متل كشف العلامات و رسالة الدافع اما جواز السفر و الشهادة واثبات اللغة ممكن نأجلهون لشهر 8..

شو بتغطي المنحة الهنغارية?


المنحة الهنغارية بتغطي التكاليف التالية:
  1. سكن او بدل سكن بما يقارب ال 135 يورو.
  2. بدل معيشة بما يقارب ال 140 يورو ( اما لطلاب الدكتوراه 450 يورو ).
  3. ما مننسى طبعا فيزا ال تشنغن يلي بتسمح بدخول اهم الدول الاوروبية.
ممكن سكن المعيشة ما يكفينا , هالشي بيعتمد على نمط المعيشة و المدينة يلي رح تدرس فيها..ممكن الطالب يحتاج مبلغ بسيط فوق البدل..

بس مانا مشكلة لانو الطالب بيقدر يشتغل 24 ساعة بالاسبوع وبتصور هيك بكون ماعد في مشاكل مادية..

الشريك السوري في المنحة الهنغارية

في شغلة بدي احكي عنها قبل ما احكي عن طريقة التقديم للمنحة الهنغارية وهي الشريك السوري :

📌 المنحة كل سنة بتحدد شريك بداخل سوريا مسؤول عن تصفية الطلبات...
بعد ما نقدم طلباتنا للمنحة..المنحة بترجع بتبعت الطلبات للشريك السوري يلي هو بكون غالبا جامعة دمشق..

الشريك السوري بحط شروط زيادة عن المنحة وممكن يعمل مقابلات وبعدين بيختار العدد المطلوب يلي هو 250 شخص وبضيف حوالي ال 100 طالب زيادة وبيبعت هالاسماء للمنحة مرة تانية .

 الشروط السنة الماضية كانت :
  1. جواز سفر ساري المفعول ( هاد الشي ما كان مطلوب بالمنحة لحتى شهر 8 ).
  2. تحقيق شرط اللغة الانكليزية.
  3. لازم يكون المتقدم بداخل الاراضي السورية حصرا..

آلية القبول في المنحة الهنغارية

بعد ما نعبي طلباتنا ونجهزها ونبعتها لموقع المنحة رح تقوم ادارة المنحة ببعت الطلبات للشريك السوري يلي حكينا عنو قبل شوي, بعدين الأسماء المقبولة من الشريك رح تنبعت لادارة المنحة مرة تانية والمنحة رح تبعت الموافقات للطلاب يلي انقبلوا ( هاد القبول المبدئي )

الجامعة يلي اخترناها بالرغبة الاولى لح تتواصل معنا وتحددلنا موعد للمقابلة ( غالبا عن طريق برنامج سكايب Skype ) اذا كانت لغتك الانكليزية جيدة ف انت غالبا رح تنقبل

المقابلة عبارة عن اسئلة روتينية متل :
احكيلنا عن حالك - سبب رغبتك بهاد الفرع - طموحك بعد التخرج -....

اذا انرفضت من الجامعة الاولى لح تنتظر رد الجامعة التانية واذا رفضتك كمان ف أنت برا المنحة اكيد..

طريقة التقدية للمنحة الهنغارية :

  • اول شي منفوت عالرابط يلي رح يكون تحت ( موقع المنحة ) رح نعمل حساب عالموقع وهنن بيبعتلونا كود عالايميل هاد الكود بتصير بتفوت فيه على طلبك بالموقع
  • تاني خطوة هي اختيار التخصص والجامعة :
منفوت عالبحث ومنحط الرغبة يلي بدنا ياها بيطلعولنا الجامعات يلي متواجد فيها الاختصاص يلي حطيناه بعدين رح نعمل تصفية نحنا بين هالجامعات لنختار افضل 2 ونقدم عليهون ...
كيف ?

رح ندخل لكل جامعة ونشوف المتطلبات يلي طالبتا متل شهادة اللغة الإنكليزية وشكل المقابلة وعدد الكراسي المقدمة
اغلب الجامعات عم تكتفي بشهادة B2 للغة الإنكليزية وبمقابلة عالسكايب .. بس في جامعات بتطلب توفل او ايلتس هي رح نبعد عنها ( بالنسبة للاشخاص يلي مامعها ).
وهيك رح نختار أفضل جامعتين تكون شروطون سهلة وعدد الكراسي المقدم للمنحة كبير..

السنوات الماضية كانت المنحة بتخليك تحط 3 جامعات اما السنة الماضية صاروا جامعتين بس ( رغبتين يعني )
  • الخطوة التالتة :
بعد ما نختار الجامعات رح نبلش بتعبئة الطلب الخاص فينا ويلي هو عبارة عن تعبئة معلومات عادية متلو متل اي منحة تانية..
وبعدا رح نضيف المستندات الموجودة بين ايدينا ونقدم طلبنا..
* بعد ما تبعت الطلب ماعد فيك تعمل اي تعديل عليه *

  • المنحة بتطلب منك رسالة دافع :
فينا نعمل رسالة دافع كتير مميزة لحالنا بدون ايا مساعدة من حدا..
مندخل على غوغل ومنشوف نماذج جاهزة ونحاول نقلدها وما بنصح بطريقة النسخ واللصق ابدا فينا نقتبس طريقة الكتابة والترتيب بس مو اكتر..

منحكي برسالة الدافع شو رح تفيدنا المنحة شخصياً وشو رح نقدم لبلدنا بعد ما نرجع عليها. 
فينا نفس رسالة الدافع نبعتها للجامعتين ..

نصائح إضافية للمنحة الهنغارية

- فرضاً كنت مختار الرغبتين غير بعض متل طب وهندسة ( هاد الشي ما بنصح فيه ابدا ) يفضل الرغبتين يكونوا نفس بعض او كتيير قراب عبعض مشان المنحة ما تفكر انك ضايع ومالك عرفان شو بدك.

كلشي شهادات عندك ياها بالبيت لالك حطها مع طلبك ( شهادات بمجالك - اعمال تطوعية - شهادات رياضية -...)
هالقصة كتير مهمة ... المنحة بتهتم انك تكون انسان فعال بالمجتمع والك حياتك الاجتماعية الخاصة فيك وتكون قادر على تحمل المسؤولية ( يعني تكون بتعرف تدبر امورك )

أسئلة وأجوبة خاصة بالمنحة الهنغارية

📍 انا هي السنة تخرجي لسا ما معي مصدقة التخرج بقدر قدم ?

- وانت عم تقدم طلبك فيك ترفع ورقة تتعهد فيها انك لح ترفع الاوراق الناقصة لاحقا ( قبل شهر 8 ) هاد طبعاً في حال انك متأكد انك بتلحق تطلع وثيقة التخرج قبل هالموعد.

📍 انا مستوايي بالانجليزي منيح بس مامعي شهادة شو اعمل ??

- بتروح على اي معهد لغة بمحافظتك وبتعمل اختبار تحديد مستوى (Oxford) او بتروح عالمعهد العالي ل للغات وبتعمل نفس الشي تقريبا التنين نفس المستوى بس اذا قدرت تاخدها من المعهد العالي بكون احسن.
في شباب عم تقول مشان قيد الماجستير انو مقبول وبتعرف عالم طلعت وهية مقدمتو انا ما بعرف بصراحة بس بفضل انو تقدم على شهادة تحديد مستوى اضمن.

📍 اثبات الصحة / الشهادة الطبية يلي بيطلبوها ?

- بيطلبوا منك شهادة بتثبت انك تكون خالي من الامراض السارية و المعدية فيك تعملها بأي مشفى خاص او مركز طبي ( ما بعرف اذا بيمشي الحال بمشفى حكومي )
انا سألت السنة الماضية عن فحص الايدز لحالو وقالولي انو بكلف قريب ال 8 الاف ليرة بدمشق.
📍 ما معي جواز سفر / جواز سفري خالصة مدة صلاحيتو ?

- الطرف الهنغاري ماعندو مشكلة انو يكون جوازك خالص او مو معك هو بهمو انك في حال انقبلت لازم يكون الجواز معك مشان تقدر تسافر ما بهمو ايمت رح تطالعو..
اما الشريك السوري نزل شرط اساسي للقبول وهو انو يكون جواز السفر معك وفيه صلاحية يعني مو خالص..
( وهالشي خلا عدد كبير ينرفض السنة الماضية )

📍 السنة الماضية ما قبلوا غير طلاب ماستر ودكتوراه ما قبلوا بكالوريوس عنجد ?
- السنة الماضية قبلوا بكالوريوس اقل من طلاب الماستر والدكتوراه قبلوا بحدود ال 30 طالب حسب ما اذكر وكلهون باختصاصات قريبة من المعلوماتية.
بس هاد ما بيعني انك ما تجرب حظك وتقدم لو شو ماكانت رغبتك لانو كل سنة شو بيتغير ما حدا بيعرف.

📍 ماعم لاقي طب او اسنان او صيدلة بموقع المنحة شو الحل ?
- الاختصاصات الطبية بهنغاريا ما بتجي تحت اسم البكالوريوس بتجي تحت اسم one tier master وهو معادل للبكالوريوس عنا...
مشان هيك لما بدك تدور ع اختصاص طبي لا تدور بس بقسم البكالوريوس.

📍 نحنا برا سوريا في مشكلة بالتقديم ممكن ما ننقبل ?
رح احكي بشكل عام
الطرف الهنغاري ما عندو مشكلة 1% انك تكون مقيم برا بلدك..بس الشريك السوري السنة الماضية كان عندو شرط اساسي انك تكون مقيم داخل الاراضي السورية..
في كم حدا انقبل من برا بس معدودين عاصابع الايد..
بجوز هالسنة يلغوا الشرط لسا ما منعرف.

📍 وراقي بدي صدقها وترجمها كلها ?
- كل الاوراق يلي بدك تقدمها لازم تكون مترجمة ومصدقة اصولاً
صدقوني كل ما قدرتوا تختموا وراقكون اكتر بتكون الاوراق اقوى ومعترف عليها.
الاوراق كلها رح تترجم وتتصدق وتنبعت pdf..

ملاحظة هامة حول المنحة الهنغارية

المنحة بتطلب منك جميع اوراقك بالنسخة الاصلية وبالنسخة المترجمة ( يعني بتصورها وبتبعتها بالعربي وبالانجليزي مع بعض ما بكفي تبعت المترجمين بس !!! )

📍 رسالة الدافع ما عم اعرف شو بدي اكتب فيها ?

- اول شي رسالة الدافع بدها تكون باللغة الانجليزية يعني مترجمة وعليها توقيعك واسمك بس..
رسالة الدافع عليها نسبة كبيرة من قبولك او رفضك لانها هية يلي رح تعكس شخصيتك وطموحك قدام اللجنة..

طريقة كتابة رسالة الدافع بشكل مختصر


  • اول شي : بتعرف عن نفسك وبتشرح عن حالك علميا شوي ومستوى دراستك السابق وهيك
  • تاني شي : بدك تجاوب على سؤال ليش بدك تتقدم لهي الدرجة الدراسية ? انت هون بتحكي اني بدي صير 'مهندس' مثلا وبدي ادخم بلدي وساعد باعادة الاعمار ومن هالحكي.
  • تالت شي : بدك تجاوب على سؤال ليش اخترت هاد التخصص بالذات ? هون بقا انت وشاطرتك بتحاول توصل كل رغبتك بهالفرع بالرسالة هي.
  • رابع شي : سبب اختيارك لهنغاريا ? بتكتب انو هنغاريا بلد قوي والتعليم فيها ممتاز وانها بيئة حاضنة ومناسبة للطلاب لاها بتقع بقلب اوروبا ورخيصة المعيشة ومن هالحكي هاد.
  • خامس شي : شو طموحك بعد ما تتخرج من عنا / وين شايف حالك بعد التخرج ? هي اهم نقطة برسالة الدافع ( احتمال تنقبل او تنرفض بسببها ) حاول تكتبها على رواق واوعك تنسخ من غوغل ايا جزء منها.
📍 شو رح نعمل مشان الاوراق الناقصة ?
- بترفع ورقة بتتعهد فيها (باللغة الانجليزية طبعاً) انك رح ترفع النواقص يلي بطلبك قبل تاريخ 8/1 ويلي هنن كذا وكذا وبتوقع عليها وخالصين.
الأفضل لو بتقدم طلبك كامل وخصوصي شهادة اللغة وجواز السفر مشان الشريك السوري
📍 شو احسن الجامعات يلي ممكن نقدم عليها ?
- لا توهم حالك بهالحكي الجامعات بهنغاريا كلها ممتازة انت حاول تخلي تقديمك على الجامعتين يلي بتلاقي شروطهون سهلة وبياخدوا مقاعد اكتر من غيرهون وبس.

📍 تكاليف المعيشة بتكفينا من الراتب يلي رح يعطونا ياه ?
- اذا كنت ببودابست اكيد لاء رح تحتاج اقل شي 50 يورو او اكتر
اما بباقي المناطق ممكن يكفوا اذا عشت عالطبخ وبدون بحترة يعني على قدك..
والساعات المسموح فيها بالعمل هية 24 ساعة اسبوعياً متل ماذكرنا.

وأخيرا رابط التقديم :

https://apply.stipendiumhungaricum.hu/

شاركونا تعليقاتكم
د.محمد عبد الرحيم
الاسمبريد إلكترونيرسالة